عمر بعمرين

عشرين .... إيه يا غالية ..  عشرين ..

زيدهم شهر و بالكشي نهارين اخرين ..

عشرين .. فيهم دللتني ، فقرتني، غنيتني، سكنتني، سكتتني، سكرتني،سهرتني ..

ما تلهيتش بيهم تعداو في رمشة عين 

حبيت،تنهيت، سبيت ، تسبيت ، بكيت ، غنيت ، و قداش منك تشكيت ..

شنية هوما عشرين ؟

ما جاوش عمر ترمة لصقت في كرسيك 

ما جاوش قد عمر شهيد خبيتو فيك 

و لا جاو ، حتى بالألف، قد إلي احبوا يفديو رواحهم ليك..

يا غالية لو كان نزيد قدهم في عمري مرتين و انا نلوج على كلام يتقال فيك و شوية عليك ..

يا ترنكوشة ، مزيانة، بزناسة ، في لون الفلة و الياسمينة على خدودك قرنفلة ، بوقرعونة..

حبوا يخطفولك شبابك .. يا حرة يا للة الأحرار بلسانك حد ما امد يدو عليك ..  إخليلك عبادك ..

و قالولي حبوا اقرطسوك .. الخمار بالسيف إلبسوك .. تخبي زينك و لا عاد تسكر لا تسهر .. و ربهم إلي ما قلهم هكا يعملوا فيك ، لا إنجمو احطو عليك ايد ...

يا غالية سمعت إلي سابوك و باعوك رجعوا احبوا اعاودو يشروك بفيستة مقلوبة ياخذوك ما تخافش ، حبابك ما إخلوك .. 

طفيتلي عشرين شمعة و دمعة ، عشرين ورقة تكتبت من غير شبعة .. عشرين مشاو من غير رجعة .. شعلتلي قدهم أربعة اخرين و انا في ترابك مكبشة ...

يا حنينة قوم ما تخممش .. كحل عينيك .. اشطح فزاني على حس الدربيك .. 

يا غالية تعداو عشرين و زدتني في بلاصة العمر عمرين .. رجعتلي الضحكة للعينين ...