أول مرة نكتب بلوغتي

أول مرة نكتب بلوغتي..
خنتها توا سنين مع لغة محشمتش م العينين..

لغتي مازال معملولهاش منجد
أما تطورت عبر السنين..(مالقيتش حاجة بالأين لصقت هاذي من كتاب تاريخ)

آش ذكرني بها توا؟!!

توا، مش قبل شويا على خاطر صعبت عليا..
توا، على خاطر شهر رمضان مايجيش نكتب بلغة ماسونية.. (هذا يدخل في إطار حملة إرجاع جميع الظواهر المتفشية للصهيونية و الماسونية ... و إذا معجبكمش تنجموا تعملوا صفحة و تناشدوا باش إنحيولي الجنسية)

توا، على خاطر كثروا عليا المسلسلات الليلية و اللغة عزت بيا
نتصور فيها معاني تعبر عن أكثر من طرق الإغراء العصرية ..
أما فك عليا مش هاذي القضية..

توا،على خاطر ثما شكون يحكي بها حتى لوكان تختلف شويا..

لغة' إشحالك '،' وين جيتي '،بندير (مش كيما بنديرمان أما معناها باش نعمل ) و هيا ندبوا شويا (أيا نمشيو )...
لغة صاحوا بها رجال تقطعت خبزتهم قعدوا في الثنية..
تنساو ولا تناساو عليهم ثمة ما أهم سنة دولية..
مازلنا غاطسين في السهريات قلهم إزيدو في دار خالتي شويا..

ولا تعرفشي كيفاش طفي الضو أخطانا .. و شجع المواهب الفتية (هكا ماهي تتقال!؟)
طرف نقد بناء بربي و تصفيقا حارة عليا

ب.أس = كان التدوينة خايبة برشة براس لحنينة إضرب لا، هاني نفركس على إيتيد