lundi

ما تعرفهاش وسيلة !







مانيش باش نحكي في السياسة، لا على الحقوق ، لا الحريات ، لا النقاب ، لا اللحية ، لا البهامة ، لا الحداثة ...

لا على البرد ولا على البطالة ...

و لاني إنظر على الاقتصاد ، لا عندي مشروع دستور ، وما نعرش علاه تونس ما ربحتش البارح في الماتش ...


نحب نحكي على وسيلة ..
أي نورمال ما تعرفهاش وسيلة ! 

وسيلة إلي المعمل عملها وسيلتو..

تخرج كل نهار قبل ما الشمس تزرق ، تشد كرسيها ، تركب 1286 قطعة على ضو النيون، وبعد ما الشمس تغرب ، لدارها تروح ضهرها مقوس.
كل واحد منا عرضتو وسيلة ، ممكن شافها في التران وما خلالهاش بلاصة.. ولا ضحك عليها كي همها هي وصاحبتها اش باش اطيب عشا وقت هو يناقش في وضع لبلاد ..

تغلط كان تتصور اني غايتي نطالب بحق وسيلة ! هههه تي على أنا حق تحكي؟؟

و... ما نحب حد يحكي على وسيلة ويعملها ضحيتو باش يوصل! 

أي هاني نحكي عليها ...
هاي ! 

حتى أنا عملتها وسيلة باش نطلع للبرج العالي متع المثقفين ، الاعلاميين السياسين ، الفايسبوكيين ، ريق المجتمع المدني و- من جاورهم في التنبير والكلام على الشعب الكريم ...

خاطر وسيلة ما حكاتش على روحها

زعمة كان  نقول لوسيلة حقوقها .. ندزها تو تفيق .. نمشيلها ونحكي معاها مرة وثنين 
تو  معادش نحكيو على وسيلة .. تو تحكي على روحها...

و البرني...  بردان .. كان في بقعة الحوايج اعانات مرة جاية نلمولو حق نعجة  توا هو يشري السروال ..

Bref....
صحيح ثمة برشة بهامة و " تعوليش " ( من علوش ) ... كي كل واحد من ببوشتو وما اوعي كان حوايجو مش باش يتبدل شي !!

هي مكتوبة علينا نهضة ! رجعوها نهضة عقول !

1 commentaire:

  1. عمرك لا تسنس البرني و وسيلتو باللقمة الباردة ...
    الي يحب يجيبها راجل و الا بنت بوها و ديڨوردي ... يلوج شكون يخدمهم و ما يكللهمش حقهم !!
    الي يحب يعاون ... يبنيلهم معمل ... و لا يستقطبلهم استثمار ...
    ليوم تلبسو سروال ... غدوة يتقطع !!

    RépondreSupprimer

Laissez une note..

Pages

D'autres notes

Related Posts Plugin for WordPress, Blogger...